ഗന്ധര്‍വയാമം ********
ഞാനൊരു കടല്‍ക്കുതിര..,
ഏകാന്തതയുടെ
അത്യഗാധ നീലിമയില്‍ നിന്ന്
കാലത്തിന്റെ ഒറ്റച്ചുഴിയില്‍പെട്ട്
പ്രണയ തീരത്തടിഞ്ഞ കടല്‍ക്കുതിര..
എന്റെ നിറവയറിനകത്ത്
പ്രതീക്ഷയുടെ വെളുത്ത ഗോളങ്ങള്‍
അടക്കം ചൊല്ലുന്ന
മന്ത്രങ്ങള്‍ ഞാന്‍ കേള്‍ക്കുന്നുണ്ട്....
ഊഴം കാത്ത് അവയോരോന്നും
വികാര സ്വപ്നങ്ങളുടെ
സ്വയംവര മണ്ഡപത്തില്‍
സാഫല്യത്തിന്റെ മിഥിലജയെ തേടി
ശൈവചാപം കുലക്കാനുള്ള സിദ്ധികള്‍
സ്വായത്തമാക്കുന്നുമുണ്ട് ...
ഇനി വരും
പ്രകാശവര്‍ഷത്തിന്റെ
അരനാഴികക്കപ്പുറം
എനിക്കായൊരു ഗന്ധര്‍വയാമം...
അന്ന്
നിന്റെ ഉടയാടകള്‍ക്കുള്ളിലെ
നനുത്ത ഹൃദയത്തില്‍
ഞാന്‍ വിശുദ്ധിയുടെ ആദിപാപം തിരയും..
നിന്റെ മുലകളില്‍ വിരലോടിക്കുമ്പോള്‍
മാറിലൊളിപ്പിച്ച സരോദില്‍ നിന്ന്
ബിഥോവന്റെ സംഗീതം ഞാന്‍ കേള്‍ക്കും..
പിന്നെ
അധരങ്ങളില്‍
അനുരാഗസന്ധ്യക്ക്
അസ്തമന സൂര്യന്‍
ചുവന്ന ചക്രവാളം തീര്‍ക്കും..
ഒടുവില്‍
നിന്റെ മിഴിചെപ്പിലൊളിപ്പിച്ച
മരണത്തിന്റെ മഹാസമുദ്രത്തില്‍
ഞാന്‍ നീന്തിത്തുടിക്കും..
No comments:
Post a Comment